Sut?
Sut ydw i’n cael achrediad?
Trwy gwblhau’r cwrs datblygu undydd yn llwyddiannus, cytuno i ddilyn cod ymddygiad a datgan eich bod yn ‘addas a phriodol'.
Ni chodir unrhyw ffi am ymaelodi â'r cynllun, ond rhaid i chi dalu i fynd ar y cwrs datblygu.
Sut ydw i’n ymaelodi â’r cynllun?
Gallwch wneud cais ar-lein a chael gostyngiad yn y ffi ar gyfer y cwrs datblygu, neu gallwch gael ffurflen gais trwy’r post trwy gysylltu â gweinyddwr y cynllun.
Gwneud cais ar-lein:
Gan ddibynnu a ydych yn landlord preifat ynteu’n rhan o gwmni, gweler y cyfarwyddiadau isod:
Ar gyfer ceisiadau unigol – mae mor hawdd ag 1, 2, 3!
- 1. Ewch i CAIS AR-LEIN a llenwch y ffurflen gais ddiogel ar-lein. Bydd angen i chi ymrwymo i’r cod ymddygiad hefyd, datgan eich bod yn addas a phriodol a derbyn yr amodau a thelerau.
- 2. Archebwch a thalwch am y sesiwn datblygu undydd.
- 3. Ewch i’r sesiwn undydd a’i phasio’n llwyddiannus.
Os ydych yn gwmni neu bartneriaeth, bydd rhaid dilyn y broses ganlynol i ymaelodi â’r cynllun:
- 1. Bydd yr ymgeisydd yn gwneud cais ar-lein ar ran y cwmni. Os ydych yn asiant, bydd angen i chi allu dangos eich bod yn aelod o gorff proffesiynol cydnabyddedig er mwyn sicrhau bod gennych Yswiriant Diogelu Arian Cleientiaid ac Indemniad Proffesiynol.
- 2. Yn ystod y broses gwneud cais, gall y cwmni anfon e-bost at ei staff yn gofyn iddynt hwythau ymaelodi â’r cynllun hefyd.
- 3. bydd angen i bob aelod o staff sy'n gweithio yn y busnes gosod a rheoli eiddo lenwi cais unigol (gan ddilyn camau 1,2,3, a 4 uchod). Yna, bydd angen i ddwy ran o dair o'r staff hynny ddilyn sesiwn datblygu undydd.
- 4. Gellir archebu a thalu am y cwrs undydd o gyfrif y cwmni neu gall yr aelodau unigol o staff archebu a thalu am y sesiwn.
- 5. Unwaith y bydd y broses gyfan wedi’i chwblhau, caiff eich cwmni ei achredu, ynghyd â phob aelod unigol o staff yn ei enw ei hunan (os bydd wedi cwblhau’r cwrs).
Pan fyddant wedi’u hachredu, gall landlordiaid ac asiantau fanteisio ar y canlynol:
- Cewch dystysgrif a chopi o logo’r cynllun i’w ddefnyddio wrth hysbysebu’ch busnes.
- Cewch becyn croeso a fydd yn cynnwys llawlyfr i gydategu’r sesiwn datblygu yr aethoch arni, yn ogystal â rhestr ddefnyddiol o enwau cyswllt a gwybodaeth fuddiol arall.
- Cewch gadw’ch mynediad at eich cyfrif ar-lein. Gellir defnyddio’r cyfrif hwn i gadw cofnod o’r Datblygiad Proffesiynol Parhaus (DPP) a gallwch lwytho ffotograffau o’ch eiddo i denantiaid eu gweld wrth chwilio am landlordiaid achrededig. Hefyd, cewch ddiweddaru eich manylion cyswllt a chael newyddion a hanes digwyddiadau ar-lein, pryd bynnag y bydd yn gyfleus.
- Bydd gweinyddwr y cynllun wrth law i gynorthwyo pryd bynnag y gall, p’un ai trwy drefnu hyfforddiant ychwanegol, rhoi’r enw cyswllt cywir yn yr Awdurdod Lleol i chi, neu roi cymorth a chyngor cyffredinol.