Pam?
Pam fyddai’r cynllun hwn yn addas i mi?
Os ydych am wneud yn siwr bod eich busnes rhentu’n rhedeg yn llyfn ac yn cydymffurfio â’r gyfraith, dylech ymaelodi â’r cynllun hwn. Byddwch yn gallu dangos i denantiaid posibl eich bod wedi ymrwymo i ddarparu llety o ansawdd sydd wedi'i reoli'n dda. Dylai'r achrediad roi mantais i chi wrth gystadlu yn erbyn darparwyr eraill a byddwch yn gallu bod yn sicr bod eich busnes yn 'gwneud pethau'n iawn'.Mae’r cynllun yn agored i unrhyw un sy'n byw neu'n gweithio yng Nghymru - boed yn ystyried prynu llety ar gyfer ei osod neu wedi bod yn rhentu portffolio o eiddo ers blynyddoedd.
Beth yw manteision ymaelodi â’r cynllun?
Mae nifer o ffyrdd y gall landlordiaid fanteisio i’r eithaf ar y buddion a’r cymhellion sy’n gysylltiedig â’r Cynllun Achredu.
I lawer o landlordiaid, bydd y wybodaeth a gânt trwy fynd ar y cwrs a'r gydnabyddiaeth a ddaw o fod yn aelod o'r cynllun yn ddigon, ond deallwn hefyd y bydd pobl am gael gwerth am eu harian ac yn disgwyl mwy.
Mae’r cynllun yn gweithio’n barhaus i gynyddu a gwella amrywiaeth o gymhellion a buddion a gynigir gan y cynllun. Mae'n bosibl y bydd eich Cyngor lleol yn cynnig rhai ychwanegol hefyd.
Dyma enghreifftiau o’r manteision cyfredol:
- Marchnata blaenoriaethol: i chi a’ch eiddo ar wefan ALC
- Gwell mynediad: at Ddigwyddiadau a Chyhoeddiadau Awdurdodau Lleol. Hefyd, cewch fod y cyntaf i glywed am sesiynau ymwybyddiaeth a hyfforddiant ychwanegol.
- Dogfennau cefnogol: Darperir deunyddiau cyfeiriol ar gyfer y Cwrs Datblygu.
- Rhwydwaith Cefnogaeth Ehangach: Dewch yn rhan o rwydwaith landlordiaid ehangach
- Un cais yn cwmpasu pob ardal ALl yng Nghymru: Gan fod y cynllun yn un ar gyfer Cymru Gyfan, nid oes raid i chi ond ymuno un waith, ni waeth faint o ardaloedd ALl y mae gennych eiddo ynddynt.
- Gwell proffil: i chi a’ch busnes
- Manteision ariannol: Gostyngiadau ar wasanaethau a chynnyrch oddi wrth amrywiaeth o gyflenwyr