Cod Ymddygiad

Byddaf yn gweithredu mewn modd teg, gonest a rhesymol bob tro wrth ddelio â thenantiaid cyfredol a/neu ddarpar denantiaid. Ni fydd tenantiaid cyfredol na/neu darpar denantiaid yn cael eu trin yn llai ffafriol nag unrhyw berson na grwpiau o bobl gennyf i oherwydd eu hil, lliw eu croen, tarddiad ethnig neu genedl, crefydd, rhyw, anabledd, ymddangosiad, statws priodasol, rhywioldeb, gwleidyddiaeth, statws cymdeithasol na'u cyfrifoldeb dros ddibynyddion.

Bydd gennyf yswiriant digonol ac yn cynghori tenantiaid am yr hyn a ddiogelir gan yr yswiriant hwnnw. O ran Yswiriant Cynnwys, byddaf yn nodi yn union pa eitemau yr wyf yn berchen arnynt ac sydd wedi'u hyswirio, ac yn cynghori'r tenantiaid i yswirio'u cynnwys nhw, os dymunant.

Cadwaf gofnodion priodol a llyfrau log, a chadwaf y tystysgrifau sy'n angenrheidiol yn ôl y gyfraith (e.e. tystysgrif diogelwch nwy). Bydd copïau o’r tystysgrifau hyn ar gael i’r tenantiaid. Bydd tystysgrifau o’r fath ar gael i weinyddwr y cynllun ar gais.

Nodir fy nghyfeiriad â’m cyfeiriad gohebiaeth presennol ar y cytundeb tenantiaeth, ynghyd â chyfeiriad a rhifau ffôn unrhyw asiant sy’n rheoli / berson(au) sy’n gweithredu ar fy rhan. Rhaid i un cyfeiriad cyswllt fod yng Nghymru neu Loegr.

Byddaf yn darparu cytundeb tenantiaeth ysgrifenedig i’r tenantiaid fydd yn nodi telerau’r denantiaeth yn glir. Cadwaf gopi wedi'i lofnodi o’r cytundeb hwn a rhoddaf gopi wedi’i lofnodi i’r tenantiaid yn ogystal. Yn ogystal â’r gofynion statudol, dylai’r cytundeb tenantiaeth hysbysu’r tenantiaid o’r canlynol:

1. Faint o rent sydd i’w dalu, gan gynnwys dyddiadau, symiau a’r dull talu
2. Pwy sy’n gyfrifol am dalu biliau cyfleustodau a’r Dreth Gyngor
3. A oes ffi i’w thalu ar gyfer trefnu cytundeb gosod
4. Y cynllun diogelu blaendal (os oes un i’w gael)

Bydd rhestr gynhwysfawr (a ddylai gynnwys disgrifiad manwl llawn, gan gynnwys y cyflwr) o’r holl ddodrefn ac offer sydd yn yr eiddo ar gael ar ddechrau’r denantiaeth - bydd unrhyw ddifrod yn cael ei nodi. Byddaf i, a’r tenantiaid, yn llofnodi ac yn dyddio’r rhestr hon, a bydd copi yn cael ei ddarparu ar gyfer y tenantiaid. Cynghorir defnyddio rhestr eiddo ffotograffig.

Ar ddechrau’r denantiaeth, byddaf yn hysbysu’r tenantiaid ynghylch dyddiau casglu'r sbwriel, sut i ddefnyddio;r gwres canolog a’r dwr poeth, lleoliad y stoptap dwr a falf diffodd y nwy a chloeon y ffenestri a'r drysau. Byddaf hefyd yn cynghori'r tenantiaid ar y defnydd diogel o’r offer tân yn yr eiddo. Rhoddir canllawiau ysgrifenedig pellach yn ôl yr angen/galw.

Byddaf yn cadw cofnod o’r holl daliadau rhent ac yn darparu llyfr rhent (os yw’r rhent yn daladwy yn wythnosol) neu dderbynneb o fath arall ar gyfer yr holl daliadau a wneir gan y tenantiaid.

Os yw’r denantiaeth ar osod i fyfyrwyr, bydd unrhyw drefniadau yn ymwneud â thâl ar gadw dros yr haf yn cael eu nodi yn glir yn ysgrifenedig.

Pan fo’r cytundeb gosod yn cynnwys cymal sy’n gofyn i’r tenantiaid beidio ag achosi niwsans na phoen, byddaf yn ymdrechu i sicrhau eu bod yn cydymffurfio. Dylai'r ymateb fod yn gymedrol, a dylid cymryd camau cyfreithiol pan fetho popeth arall yn unig.

Bydd unrhyw waith atgyweirio neu welliannau i’r eiddo cyn dechrau’r denantiaeth yn cael eu cadarnhau yn ysgrifenedig a bydd y terfynau amser yn cael eu nodi wrth wneud y cytundeb. Byddaf yn cyflawni unrhyw rwymedigaethau erbyn y dyddiad a gytunwyd gan y naill barti a’r llall.

Rhai i mi fod wedi gwneud cais ar gyfer unrhyw drwydded tai amlfeddiannaeth (HMO), ac ar gyfer pob eiddo sydd mewn ardal drwyddedu ddetholus. Rhaid i bob eiddo o’r fath gydymffurfio ag amodau’r drwydded o fewn y terfynau amser a gytunir.

Os gwnaf unrhyw newidiadau i’r eiddo sydd yn gofyn am reoliadau adeiladu neu ganiatâd cynllunio, byddaf yn sicrhau bod y caniatâd priodol yn cael ei geisio cyn dechrau’r gwaith, a byddaf yn sicrhau bod y gwaith yn cael ei ardystio pan fydd wedi ei orffen.

Os oes angen gwneud gwaith neu wasanaethu offer nwy neu ffliwiau, byddaf yn cyflogi rhywun sy’n gymwys (wedi’i gofrestru â CORGI).

Os oes angen gwneud gwaith sydd yn dod o dan adran P y Rheoliadau Adeiladu, byddaf yn hysbysu Rheoli Adeiladu, neu yn cyflogi Person Cymwys Awdurdodedig, sydd wedi'i ardystio gan un o’r sefydliadau canlynol:

• BRE Certification Cyf;
• Y Sefydliad Safonau Prydeinig;
• ELECSA Cyf;
• NAPIT Certification Cyf;
• NICEIC Certification Services Cyf.

Wrth gynnal archwiliadau a phofion rheolaidd, byddaf hefyd yn sicrhau fy mod yn cyflogi person cymwys awdurdodedig.

Byddaf yn sicrhau bod yr eiddo ac unrhyw dir o fewn ei ffiniau yn rhydd o unrhyw beryglon y gellir eu hosgoi yn ôl y System Graddio Iechyd a Diogelwch Tai. Yn ychwanegol, ni ddylai fod unrhyw beryglon Categori 1 yn yr eiddo. Rhaid i bob llety fod mewn cyflwr rhesymol, a digon o amwynderau a chyfleusterau eraill fel y nodir mewn deddfwriaeth a safonau lleol.

Byddaf yn gwella unrhyw lety ansafonol i gyflawni’r safonau cyfreithiol gofynnol o fewn terfynau amser rhesymol. Byddaf yn paratoi Cynllun Gwella, sy’n nodi sut, ac o fewn pa derfyn amser, y bwriadaf wella unrhyw eiddo sydd yn ansafonol. Gall unrhyw Awdurdod Lleol wneud cais am y cynllun hwn, os oes rheswm i archwilio’r eiddo wrth gyflawni eu swyddogaethau statudol.

Byddaf yn sicrhau bod tu fewn yr eiddo ac unrhyw erddi/iard ayb yn lân ac yn daclus ar ddechrau pob tenantiaeth.

Bydd unrhyw ardaloedd cymunedol sy’n gyfrifoldeb i mi yn cael eu cadw yn lân ac yn daclus, a byddaf yn sicrhau bod yr eiddo mewn cyflwr da trwy gydol y denantiaeth.

Byddaf, trwy holl ymdrechion a chyfrifoldebau rhesymol, yn cynnal a chadw, o fewn rheswm, ymddangosiad anheddau, tai allanol, gerddi, iardiau a ffiniau, rhag mennu ar harddwch yr ardal.

Byddaf yn nodi yn ysgrifenedig, ar ddechrau’r denantiaeth, â phwy y dylid cysylltu ar gyfer gwaith atgyweirio, gan gynnwys rhif ffôn mewn argyfwng, y tu allan i oriau swyddfa, ar gyfer y penwythnosau a chyda’r nos.

Byddaf yn ymateb i geisiadau i atgyweirio o fewn amser rhesymol, sydd, mewn amgylchiadau arferol, fel a ganlyn:

Blaenoriaeth Un – Atgyweiriadau Argyfwng: : Unrhyw atgyweirio sydd angen eu gwneud i osgoi perygl i iechyd; risg i ddiogelwch y preswylwyr neu niwed difrifol i adeiladau neu gynnwys mewnol – o fewn 24 awr i adrodd am y nam. Mewn amgylchiadau pan nad yw hyn yn ymarferol, byddaf yn gwneud y trefniadau dros dro gorau posibl.

Blaenoriaeth Dau – Atgyweiriadau Brys:Atgyweirio namau sy’n amharu ar gysur neu gyfleustra y preswylwyr – o fewn pum niwrnod gwaith i'r adrodd am y nam.

Blaenoriaeth tri – Atgyweiriadau arferol, heb fod yn rhai brys: Gwaith atgyweirio ymatebol nad yw o fewn y categorïau uchod – o fewn 28 diwrnod gwaith i adrodd am y nam.

Byddaf yn ymweld â’m heiddo o dro i dro fel y bo’n addas i archwilio’r cyflwr cyffredinol ac unrhyw waith atgyweirio sydd ei angen (gan nodi’r wybodaeth wrth ymweld â’r eiddo isod).

Byddaf yn cynnwys gwelliannau effeithlonrwydd ynni mewn cynlluniau ailwampio, pan fo hynny’n ymarferol.

Byddaf yn parchu hawl y tenant i fwynhau’r eiddo yn dawel a heddychlon, a derbyn nad oes hawl gennyf i gael mynediad at ardal fyw y tenant heb ganiatâd.

Pan fod angen mynediad er mwyn cynnal archwiliad(au) neu i bobl weld yr eiddo, bydd y tenant yn derbyn hysbysiad o’r dyddiad, amser a phwrpas yr ymweliad, ddim llai na 24 awr o flaen llaw, oni chytunir yn wahanol, ac eithrio pan nad yw rhoi hysbysiad o'r fath yn ymarferol e.e. mewn gwir argyfwng).

Ni fyddaf yn defnyddio unrhyw ddull anghyfreithlon o adennill meddiant yr eiddo.

Ni fyddaf, onid oes rheswm da, yn gwrthod rhoi geirda i denant er mwyn iddo ef/hi sicrhau tenantiaeth newydd.

Rhoddir canllawiau clir ysgrifenedig i denantiaid ynghylch safon glanhau a threfniadau eraill, gan gynnwys y cyfnod o rybudd sydd ei angen i ddiweddu tenantiaeth, er mwyn osgoi camddealltwriaeth ynglyn â’r safon o lendid a chyflwr a ddisgwylir yn yr annedd ar ddiwedd y denantiaeth.

Byddaf yn sicrhau fy mod yn cynnal a gwella fy ngwybodaeth am y ddeddfwriaeth gyfredol berthnasol ac arfer da.

Ni fyddaf yn ymddwyn mewn modd a fyddai’n dwyn gwarth ar y Cynllun Achredu.

Mae pob cyfeiriad at unigolyn yn y Cod hwn yr un mor gymwys i Gyfarwyddwyr, Partneriaid a/neu'r rheini a gyflogir gan Gwmni neu fusnes a achredir gan y cynllun hwn.

Fel asiant byddaf yn darparu datganiadau ysgrifenedig o amodau a thelerau i’r landlord, gan fanylu ar hawliau a chyfrifoldebau a rhwymedigaethau cytundeb yr asiant.

Bydd asiantau nad ydynt yn gyfrifol am safonau’r eiddo yn hysbysu’r landlord yn ysgrifenedig am unrhyw beth sydd angen sylw neu unrhyw ofynion statudol eraill, a byddant yn hysbysu’r Awdurdod Lleol os nad yw’r landlord yn unioni unrhyw broblemau mewn amser derbyniol. Fel asiant byddaf, pan fydd unrhyw breswylydd yn fy hysbysu o unrhyw risg i iechyd neu ddiogelwch, yn ei gynghori ef/hi i hysbysu’r Awdurdod Lleol. Os nad yw’r preswylydd yn gallu gwneud hyn, byddaf yn adrodd am y mater ar ei ran ef/hi.

Byddaf yn darparu gwybodaeth i’r holl landlordiaid am y Cynllun Achredu Landlordiaid Cymru, a’u hannog i ymuno.